Preguntas de entrevista para técnico e enxeñeiro de calidade

1.Éntrache unha reclamación de cliente ás once da mañá. Que fixeches antes de marchar para a casa?

Que buscar: Contención inmediata: bloquear stock no almacén, en tránsito e nas instalacións do cliente, decidir se hai que seleccionar en destino, avisar a produción e fixar un criterio de corte por lote ou data. Resposta ao cliente coa contención dentro do prazo que marque o seu procedemento. Que distinga con claridade conter de resolver.

Alarma: Empeza buscando a causa raíz ou enchendo o formulario sen ter parado o material sospeitoso.

2.Explícame un 8D que pechases ti, co problema real.

Que buscar: Problema descrito con datos (que, onde, cando, cantas pezas, análise é / non é), causa de ocorrencia e causa de non detección, como a confirmou reproducindo o defecto ou con datos, accións permanentes e a súa validación. Na disciplina sete, actualización do AMFE e do plan de control, e extensión do aprendido a produtos parecidos.

Alarma: Causa raíz «erro do operario» e acción «formación». Ou un 8D sen unha soa liña sobre por que o control non o viu.

3.Como sabes que unha acción correctiva funcionou?

Que buscar: Seguimento con datos durante un período definido, ningunha repetición nos lotes seguintes, comprobación en planta de que a acción se segue aplicando e peche formal co cliente. Que fale de eficacia e non quede na data de implantación.

4.Ponme un exemplo dos cinco porqués que te levase a unha causa que non esperabas.

Que buscar: Unha cadea lóxica que se pode percorrer ao revés («e por iso…») e que remata en algo sobre o que se pode actuar: un parámetro sen control, un mantemento que non se facía, unha cota do plano mal interpretada.

Alarma: Os porqués saltan dun tema a outro ou detéñense nunha persoa.

5.Que normas traballaches e que papel tiveches na última auditoría de certificación?

Que buscar: Normas coa súa versión (ISO 9001:2015, IATF 16949, IFS Food, BRCGS, GMP, ISO 13485) e un papel concreto: preparou documentación, acompañou o auditor, defendeu procesos, pechou non conformidades. Que lembre algunha non conformidade e como se resolveu.

Alarma: Enumera normas da súa empresa en cuxas auditorías nunca estivo presente.

6.Fixeches auditorías internas? Que atopaches na última?

Que buscar: Planificación, lista de verificación adaptada ao proceso, evidencias obxectivas, redacción de achados e seguimento. En automoción, auditorías de proceso tipo VDA 6.3 ou de produto; a formación de auditor interno, se a ten, suma. O mellor é un achado concreto que acabou nun cambio.

7.Nunha auditoría de cliente ábrenche unha non conformidade maior. Como a xestionas?

Que buscar: Entender ben o requisito incumprido, non discutir en quente salvo malentendido evidente, análise de causa, plan de accións con responsables e prazos dentro do que marque o cliente, e evidencias de peche.

Alarma: A súa estratexia é convencer o auditor ou maquillar a evidencia.

8.Se vés de alimentación: como preparas unha auditoría IFS ou BRCGS non anunciada?

Que buscar: A planta ten que estar sempre lista: APPCC revisado, rexistros de PCC ao día, simulacro de trazabilidade e retirada feito no ano, xestión de alérxenos, control de corpos estraños, plan de food defense e traballo sobre cultura de seguridade alimentaria. Que saiba canto tardou o seu último exercicio de trazabilidade.

Alarma: Pon a planta a punto a semana antes da visita.

9.Que gráficos de control usaches e que facías cando un punto saía fóra?

Que buscar: Gráficos X-R ou de atributos segundo a característica, regras para detectar series e tendencias ademais dos puntos fóra de límites, diferenza entre límite de control e tolerancia de plano, e unha reacción definida: parar, axustar e revisar as pezas desde o último control bo.

Alarma: Confunde límites de control con límites de especificación.

10.Un proceso ten un Cpk baixo pero ningunha peza fóra de tolerancia. Preocúpache?

Que buscar: Si: con pouca capacidade calquera deriva xera defectos e o control final queda como única barreira. Que separe centrado e dispersión, e que antes de culpar o proceso comprobe o sistema de medida.

11.Como validas que un medio de medida serve para controlar unha cota?

Que buscar: Estudo R&R con pezas que cubran o rango, varios operarios e repeticións, lectura do resultado fronte á tolerancia ou á variación do proceso, e calibración en vigor. Que saiba que facer se o R&R non sae aceptable.

Alarma: Para el, un calibre calibrado xa é un calibre válido para calquera cota.

12.Produción quere enviar un lote dubidoso porque o camión sae nunha hora. Que fas?

Que buscar: Un criterio claro: se non cumpre, non sae sen unha derrogación aprobada polo cliente ou por quen teña autoridade para dala. E alternativas sobre a mesa (seleccionar, enviar unha parte, avisar o cliente) no canto de bloquear sen máis.

Alarma: Déixao saír para non enfrontarse a produción, ou bloquea sen explicar nin ofrecer saída.

13.Un provedor repite o mesmo defecto por terceira vez. Que fas?

Que buscar: Reclamación formal con 8D esixido, repercusión de custos segundo o acordado, visita ou auditoría nas súas instalacións, control reforzado en recepción e, se non mellora, escalado ou plan de substitución xunto con compras.

14.En farmacia ou produto sanitario: que fas cando detectas unha desviación nun lote?

Que buscar: Rexistro da desviación, avaliación de impacto, investigación, CAPA e control de cambios se procede. Que saiba que a liberación do lote corresponde á persoa cualificada do laboratorio e non ao técnico.

Alarma: Di ter «liberado lotes» nun contorno GMP sen aclarar cal era o seu papel.